Cütlüklərin boşanmasına səbəb ola biləcək müxtəlif amillər mövcuddur. Bəzən tərəflər bir-birindən uzaqlaşır, bəzən isə ciddi fikir ayrılıqları yaranır. Bura zorakılıq, xəyanət, maliyyə çətinlikləri, uşaqlar, qohumlar, etibarsızlıq və ya cansıxıcılıq kimi səbəblər də daxildir. Əgər əlaqə möhkəm deyilsə, bu kimi amillər boşanma ilə nəticələnə bilər.

Qaynarinfo xəbər verir ki, "Your Tango"nun yazdığına görə, mütəxəssislər bu prosesə daxil olan insanların 9 spesifik davranış nümayiş etdirdiyini bildirirlər.

1. Bir-birinə qarşı nifrət hissi

Klinik psixoloq doktor Kortni Uorren bildirir ki, münasibətlərdə ən təhlükəli əlamətlərdən biri tərəfdaşların bir-birini təhqir etməsi və alçaltmasıdır. Bu, münasibətlərdəki ciddi funksional pozuntulara işarədir.

2. Uşaqların tərbiyəsində fərqli yanaşma

Sevgi və münasibətlər üzrə məşqçi Ava Kadell bildirir ki, cütlüyün fərqli tərbiyə metodlarına sahib olması boşanma ilə nəticələnə bilər. Buna görə də valideyn olmamışdan əvvəl bu məsələləri müzakirə etmək vacibdir.

3. Əvvəldən bir-birinə uyğun olmamaları

Bəzən tərəflər sadəcə uyğun olmaya bilər. Onlar ortaq plan qurmayıb və ya öz xoşbəxt olmayan valideynlərinə bənzəyə bilərlər.

4. Əyləncənin olmaması

Evləndikdən sonra bəzi insanlar səy göstərməkdən imtina edirlər: idman salonuna getməyi dayandırır, görüşlər təşkil etmirlər. Sevgi məşqçisi Erika Cordan münasibətlərin canlı qalması üçün flört etməyə və yeniliklər sınamağa davam etməyi tövsiyə edir.

5. Ünsiyyətin azalması

Transformasiya üzrə məşqçi Marla Martenson bildirir ki, bir-birini dinləməmək, söhbətlərdə qarşı tərəfi yarımçıq saxlamaq münasibətin pozulmasına gətirib çıxara bilər.

6. Yaxınlıq və əlaqənin itirilməsi

Əlaqələr üzrə mütəxəssis Rene Skulerin fikrincə, tərəfdaşların bir-birinə diqqət yetirməməsi yaxınlığın itirilməsinə və hörmətin azalmasına səbəb olur ki, bu da münasibətlər üçün təhlükəlidir.

7. Daimi mübahisələr və ya fiziki zorakılıq

Genetik Enerji İnstitutunun təsisçisi Larri Mişelin sözlərinə görə, daimi mübahisələr hörmət və anlayışın olmamasından xəbər verir və partnyorlar arasında təhlükəli güc dinamikası yaradır.

8. Maliyyəyə fərqli yanaşma

Maliyyə üzrə məsləhətçi doktor Liz Zed deyir ki, maliyyə mövzusunda fikir ayrılığı stressi və küskünlüyü artırır və bu da boşanma ehtimalını artırır.

9. Nifrətin aradan qaldırıla bilməməsi

Ailə psixoterapevti Yeva van Proyen bildirir ki, nifrət tərəflər arasındakı bağları qırır və bu, xəstəliklərə qarşı daha həssas olmağa da səbəb ola bilər. Məşhur psixoloq Con Qotmanın "Apokalipsisin dörd atlısı" modeli – tənqid, nifrət, müdafiə və uzaqlaşma – bu vəziyyətləri proqnozlaşdırmağa kömək edir. Nifrətə qarşı əsas "zərərsizləşdirici" isə sevgi və qarşılıqlı rəğbətin inkişaf etdirilməsidir.

Xoşbəxt evlilik üçün nə lazımdır?

Psixoloq Mark Trevers qeyd edir ki, uğurlu evliliklər çətinliklərin olmaması ilə deyil, bu çətinliklərlə birlikdə mübarizə aparmaq bacarığı ilə seçilir. Onun fikrincə, tərəfdaş həyat yoldaşı üçün hər şeyə çevrilməməlidir – ən yaxın dost, tək emosional dəstək mənbəyi və sair. Uğurlu münasibət hər iki tərəfin öz şəxsiyyətini və emosional müstəqilliyini qoruyaraq bir-birinə dəstək verdiyi münasibətdir.

Aydın