ABŞ hava limanlarında təhlükəsizlik yoxlamasından keçmək – xüsusilə də səyahət mövsümünün qızğın çağında – sərnişinlər üçün vaxt itkisinə və əsəb gərginliyinə səbəb olur. Lakin yeni qərar bu prosesi bir qədər yüngülləşdirə bilər.

Qaynarinfo "The Guardian”a istinadla xəbər verir ki, 2025-ci il iyulun 8-də ABŞ-ın daxili təhlükəsizlik naziri Kristi Noem ilk dəfə olaraq son 20 ilə yaxın müddətdə sərnişinlərin hava limanlarında yoxlama zamanı ayaqqabılarını çıxarmalarının artıq məcburi olmayacağını bəyan edib.

ABŞ Nəqliyyat Təhlükəsizliyi İdarəsinin (TSA) qəbul etdiyi bu qərar, 2001-ci ilin sonunda Parisdən Mayamiyə uçan reysdə Rişar Ridin – tanınmış "Ayaqqabı-bombacı"nın – terror cəhdindən sonra tətbiq edilmişdi və o zamandan bəri məcburi tədbir kimi qüvvədə idi.

Nazir Kristi Noem bildirib:

"Bu dəyişiklik TSA-nın təhlükəsizlik məntəqələrində sərnişinlərin gözləmə vaxtını əhəmiyyətli dərəcədə azaldacaq və yoxlama prosesini daha səmərəli və xoş edəcək".

O əlavə edib ki, bu qərarın əsas səbəbi təhlükəsizlik texnologiyalarında və prosedurlarında əldə edilmiş nailiyyətlərdir. Bununla belə, bəzi hallarda sərnişinlərdən yenə də ayaqqabılarını çıxarmaları istənilə bilər – əgər əlavə yoxlama tədbirlərinə ehtiyac olarsa.

ABŞ Daxili Təhlükəsizlik Nazirliyinin açıqlamasında vurğulanır ki, TSA-nın təhlükəsizlik sisteminin digər tələbləri dəyişməz qalacaq.

Məsələn, sərnişinlər əvvəlki kimi şəxsiyyət yoxlaması, uçuş təhlükəsizliyi tələblərinə uyğunluq və digər yoxlama prosedurlarından keçməli olacaqlar.

Qeyd edək ki, əvvəllər sərnişinlər TSA PreCheck proqramına qoşularaq bu tələblərin bir neçəsindən yayınmaq imkanı əldə edirdilər. Təxminən 80 dollar dəyərində olan bu proqram 2013-cü ildən tətbiq olunur və iştirakçılara ayaqqabı, kəmər və ya nazik gödəkçə çıxarmadan yoxlamadan keçməyə imkan verir.

Kristi Noem bildirib ki, yeni siyasət TSA PreCheck proqramının əhəmiyyətini azaltmayacaq:

"Əminəm ki, bir çox sərnişin hələ də PreCheck xidmətindən istifadə etmək istəyəcək. Çünki bu proqramla kəmər, palto çıxarmağa və ya mayeləri və ya noutbuk kimi əşyaları çantadan çıxarmağa ehtiyac yoxdur".

Hava limanında təhlükəsizlik yoxlamasından necə daha sürətli keçmək olar?

Qeyd edək ki, təcrübəli səyahətçi Jilbert Ott hava limanında təhlükəsizlik yoxlamasında ləngimələrdən yayınmağın yollarını bölüşüb. Bu, xüsusi fast-track xidmətinin alınması ilə deyil, geyim seçimi və əvvəlcədən hazırlıqla bağlıdır.

Bəzi geyimlər və ya onların tərkib elementləri sərnişinlərə əlavə yoxlamalar yarada bilər. Xüsusilə, parıltılı libaslar, metal dayaqlı büstqalterlər və daş-qaşla bəzədilmiş idman geyimləri bu baxımdan problemli hesab olunur.

Alpər