ABŞ-ın Manhetten dairə məhkəməsinin qərarına əsasən, OpenAI şirkəti istifadəçilər tərəfindən silinmiş hesab edilən bütün ChatGPT söhbətlərini belə saxlamaqla yükümlü olacaq.

Qaynarinfo xəbər verir ki, bu barədə "The Hill” məlumat yayıb.

Qərar "The New York Times”ın OpenAI-yə qarşı müəllif hüquqlarının pozulması ilə bağlı başladığı məhkəmə prosesində sübutların saxlanılması tələbinə əsaslanır. Hakim Sidni Stayn ötən həftə əvvəlki müvəqqəti qərarı qüvvədə saxlayaraq, OpenAI-yə bütün istifadəçi məlumatlarını qoruyub saxlamağı əmr edib. Bu qərar 70 milyondan çox istifadəçinin konfidensiallıq anlayışını ciddi şəkildə sarsıdır.

İstifadəçilər ChatGPT ilə tez-tez tibbi məsələlərdən şəxsi münasibətlərə, psixoloji travmalara qədər həddindən artıq şəxsi məlumatları bölüşür və bu məlumatların daimi silinəcəyinə ümid edirlər. Lakin yanvar ayında verilmiş məhkəmə qərarı "əks halda silinəcək bütün ilkin məlumatların” saxlanılmasını tələb edir.

Hakim Stayn son qərarında qeyd edib ki, bəzi istifadəçilərin müəllif hüquqlarını pozduqlarını gizlətmək məqsədilə söhbətləri silmiş ola biləcəkləri fərz edilə bilər. O, həmçinin bildirib ki, bu məlumatların saxlanması OpenAI-nin məxfilik siyasətini pozmur, çünki həmin siyasətdə hüquqi öhdəliklər səbəbilə məlumatların saxlanıla biləcəyi qeyd olunub.

Qərar insan haqları təşkilatlarının və məxfilik tərəfdarlarının kəskin tənqidinə səbəb olub. Mütəxəssislər bu qərarın təhlükəli presedent yaratdığını deyirlər: belə ki, gələcəkdə hər hansı bir iddiaçı milyonlarla insanın şəxsi məlumatlarının toplanmasını tələb edə bilər.

Xüsusilə həssas mövzularda ChatGPT ilə söhbətlər aparan istifadəçilər narahatdır. Onların bu məhkəmə prosesində öz məlumatlarının istifadəsinə etiraz etmək üçün real hüquqi mexanizmləri yoxdur. Ayrı-ayrı şəxslərin işə müdaxilə cəhdləri isə məhkəmə tərəfindən rədd edilib.

"The New York Times” iddia edir ki, silinmiş söhbətlərin saxlanılması zəruridir, çünki istifadəçilər müəllif hüquqlarını pozduqlarını gizlətmək üçün həmin söhbətləri silə bilərlər. Məxfilik tərəfdarları isə bu fikri rədd edərək bildirirlər ki, əksər istifadəçilər söhbətləri şəxsi təhlükəsizlik baxımından silirlər, qanun pozuntusu məqsədilə deyil.

Tənqidçilər bildirirlər ki, vaxtilə ABŞ-ın kütləvi izləmə proqramlarını ifşa edən bir qəzet — "The New York Times” — indi "NSA-nın belə arzulayacağı” bir məlumat bazasının yaradılmasını tələb edir ki, müəllif hüquqları iddiasında qalib gəlsin.

Alpər