ADMİU-nın kinostudiyasında maliyyə qalmaqalı: 167 min manat hara gedib? (AÇIQLAMA)

Universitetin Kinorejissorluq fakültəsinin məzunu Elmar Fərzəliyev Qaynarinfo-ya açıqlamasında "Tədris-film"in direktoru Elnur Mehdiyevin qurumdakı yeyintiləri ilə bağlı yeni faktlar olduğunu iddia edib:

"Universitetin Kinorejissorluq fakültəsini bitirmişəm. "Tədris-film"in ARKA-ya (Azərbaycan Respublikası Kino Agentliyi) təqdim etdiyi layihələrdən biri - "Düşmüş mələk" filmi mənimdir. Filmin çəkilişi fevral ayında yekunlaşdırılıb və təqdim olunub. "Düşmüş mələk" filmi mistik janrda çəkilib.

Bu film belə yarandı: bir gün Elnur müəllim gəldi və dedi ki, biz ARKA ilə əməkdaşlıq edəcəyik, onlar bizə filmlərin çəkilməsi üçün büdcə ayırır, siz də hazır senarinizi gətirin. Öncədən hazır olan senarilərimdən birini təqdim etdim, baxıb bəyəndilər. Başqa tələbələrə də təklif etdilər, amma onlar senari gətirmədi. Məndən başqa bir nəfər öz senarisini təqdim etdi. Elnur müəllim digər senariləri tələbələrin adı ilə guya onların öz senarisi kimi təqdim etdi. Məsələn, Yusif Quliyev adlı müəllimin senarisini bir tələbəyə verib, guya onun öz senarisi kimi göstərdi. Senarilərin hamısını Elnur müəllim özü seçmişdi.

Təqdim olunmasından iki il keçsə də, çəkiliş uzandı. Çəkiliş başlamadan öncə müəllimə smeta layihəsi verdim. Pulların köçürülməsinə gələndə, Elnur müəllim başqa cür davrandı. Təxminən 5-6 ay pullar köçürülmədi. Nə deyirdimsə, deyirdi ki, "mənə aidiyyatı yoxdur, get özün elə”. Təxminən iki min manat öz cibimdən xərclədim, halbuki pulu o verməliydi. Həmin ərəfədə öyrəndim ki, Elnur müəllim ötən il tələbələrin çəkdiyi filmlərin hamısına şişirdilmiş maliyyə qiymətləri yazıb. Məsələn, tələbə 2000 manata film çəkib, amma ona 1500 manat köçürülüb. Əslində isə sənəddə layihənin daha baha başa gəldiyi göstərilib.

Mənim filmimin çəkilişi 3 gün çəkib, amma Elnur müəllim ARKA-ya bildirib ki, film 10 günə çəkilib. Mən ona dedim ki, film 3 gün deyil, 4-5 gün çəkə bilər, o isə dedi: "Mənə aidiyyatı yoxdur, 4-cü günə keçsə, onun xərclərini özün qarşılayacaqsan”. Film bitdi və uzun aylardan sonra pullarımı ala bildim”.

Elmar Fərzəliyev ikinci filmin çəkilişlərinə başlamaq istəyəndə, Elnur Mehdiyev maliyyənin olmadığını bildirib:

"İkinci filmdə mən ikinci rejissoram. Dedi ki, vəziyyət pisdir, film çəkə bilmirik. Mən tələbə olduğum halda dedim ki, borca pul taparam, təki film çəkilsin. Dedim ki, məni prodüser kimi yazın, qonarar almaram, amma prodüserin qonararını köçürərsiniz, götürdüyüm borcu onunla qaytararam. Direktor bir qəpik pul qoymur, tələbə borc tapır ki, film çəkilsin.

Anlaya bilmirəm, bu adam niyə prodüserdir, niyə onu "Tədris-film”ə direktor qoyublar? Ondan yaxşı iş görürəm, heç kəsi tanımır, bütün heyəti mən gətirmişəm. Onların hamısını işə mən gətirdiyimdən zərər çəkirəm, deyirlər: "Pul nə oldu, biz sizi tanıyırıq”. İyunun əvvəlində çəkilən filmin pulları hələ də verilməyib. Kamal Müşfiq ARKA tərəfindən koordinator təyin edilib ki, kömək etsin. Əşyalarını lombarda qoyub, evdəki televizor və kompüteri də girov qoyub ki, filmlər çəkilsin. Elnur Mehdiyev isə yediyi pullardan iş üçün heç nə qoymur. İndi müsahibə verir ki, pul yoxdur. Pul yoxdursa, "Tədris-film” niyə var? Niyə sən onun direktorusan? Bütün dünyada sistem belədir ki, pulu prodakşn qarşılayır”.

Elmar Fərzəliyevin sözlərinə görə, bu gün "Tədris-film”in ona təxminən iki min manat borcu var:

"Hərəyə bir yalan deyir. ARKA onlara pul köçürməyə hazırdır, amma "Tədris-film”in vergiyə 4000 manat borcu var. Buna görə də ARKA "Tədris-film”ə pul köçürə bilmir. Əgər pul köçürülsə, onlar da bizim borcu qaytarar. Direktor hələ indi bilir ki, onun vergi borcu var”.

Elmar Fərzəliyev məhkəməyə müraciət edəcəyini bildirib:

"Mənim bu barədə qərarım belə olacaq – məhkəmə və qanun. Biz bunu belə qoymayacağıq. Şikayət edirik, amma baxan, dinləyən yoxdur. Ona görə məsələni qanunla həll edəcəyik”.

"Bizdə maliyyənin köçürülməsini gözləyirik. Maliyyə köçəndən sonra, bütün ödənişlər ediləcək".

Xatırladaq ki, bir müddət öncə saytımızda "Tədris-film”in tələbələri ilə ARKA arasında yoxa çıxan 167 min manat qalmaqalı” başlıqlı yazı dərc olunub. Yazıda ADMİU-nun nəzdində fəaliyyət göstərən "Tədris-film” kinostudiyasının tələbələri üçün ayrılan maliyyə vəsaitinin düzgün xərclənməməsi ilə bağlı faktlar qeyd olunub.

Tələbələr bildirib ki, "Tədris-film” kinostudiyası ilə Kino Agentliyi arasında bağlanan müqaviləyə görə 12 tələbə filminin istehsalına dövlət büdcəsindən 167 min manat ayrılıb. Sözügedən müqaviləni Agentlikdən keçmiş sədr Orxan Fikrətoğlu, "Tədris-film” kinostudiyasından isə direktor Elnur Mehdiyev imzalayıb.

Tələbələrin bildirdiyinə görə, 167 min manatdan "Tədris-film”ə 50 mindən bir qədər artıq pul köçürülsə də, tələbələrə maliyyənin verilməsi üçün zamana ehtiyac olduğu bildirilib.